Персанальную выставу "Горад, напісаны крокамі. Зваротная перспектыва" прапанавала ў Жодзіне мастак і архітэктар, прадстаўніца знакамітай дынастыі Галіна Левіна. У экспазіцыі - некалькі дзясяткаў работ - вынік падарожжа аўтара па Беларусі. Замалёўкі алоўкам Гродна, Віцебска, Глуска, Міра і Любчы. Плюс узоры праекціровачных чарцяжоў, па якіх можна прасачыць лёс знакавых знакамітых аб'ектаў - ад ідэі да рэалізацыі.
Падрабязнасці ў Наталлі Бардзілоўскай.
Архітэктурныя партрэты Беларусі
Цудоўная частка сям'і Левіных - Галіна дорыць Жодзіну дрэва вершаў! Падтрымка аднаго з самых маладых гарадоў Беларусі - дынастыйная! Бацька - Леанід Левін - узводзіў у Жодзіне помнік Купрыянаву - Герою Савецкага Саюза. Дзядуля Мендзель - супраекціроўшчык БелАЗа. Дойлідскую падтрымку горад машынабудаўнікоў атрымаў і ад Галіны Левінай: сёння яна - сустваральнік тутэйшага гасцінічнага комплексу, таксама ў мясцовай выставачнай галерэі прэзентуе персанальную экспазіцыю. У некалькіх дзясятках работ - архітэктурныя партрэты беларускіх гарадоў.
У яе работах - Гродна, Віцебск, Любча, Мір... Кожны населены пункт, вялікі і малы, Галіна адмерала ўласнымі крокамі, з алоўкам і паперай у руках. Менавіта замалёўкі-эскізы ў аснове гэтых карцін. Тут Галіна Левіна, як мастачка. Але сваю іпастась як архітэктар і рэстаўратар Левіна таксама дэманструе: асобны раздзел выставы - узоры праектных чарцяжоў.
Выстава - майстар-клас для жодзінскай моладзі. З 90-х у Жодзіне пры СШ № 8 дзейнічае архітэктурны клас, навучэнцы якога - патэнцыяльныя спецыялісты архітэктурнай, будаўнічай, рэстаўрацыйнай сферы. Многія выпускнікі паступаюць у профільныя ВНУ. Сёння хлопцы і дзяўчаты могуць пазнаёміцца з вопытам патомнага майстра і прасачыць шлях ад ідэі праз чарцёж да рэальнага аб'екта.
З жодзінскімі калегамі сустрэлася, але само Жодзіна Галіна Левіна не пісала. У планах - арганізаваць гарадскі пленэр і папоўніць сваю серыю архітэктурных партрэтаў.
Выставу архітэктурных праектаў Галіны Левінай зараз бачыць Жодзіна. Але праект - вандруючы - і яшчэ аб'едзе не адзіны горад Беларусі.