Вывесці рэгіянальную медыцыну на новы ўзровень! Кабінет камп'ютарнай тамаграфіі хутка адкрыюць у Дзяржынскай цэнтральнай раённай бальніцы. Сярод ноу-хау і газіфікатар з вадкім кіслародам. Выкарыстоўваць яго, у адрозненне ад звычайных балонаў, будзе прасцей і больш эканомна. Таксама крыяцыліндр цалкам забяспечыць рэзерв жыццёва важнага элемента. Акрамя таго, у медустанове ідзе будаўніцтва новага дыягнастычнага корпуса. Будынак плошчай 1 000 квадратаў узвядуць ужо сёлета. З'явіцца там і МРТ - абсталяванне паступіць ужо ў сакавіку.
Новае абсталяванне асабліва палегчыць працу ва ўмовах кавід-інфекцыі. Дарэчы, зараз у раёне медыкі адзначаюць невялікі спад захворвання. Але гэта не прычына расслабляцца: штам "амікрон" распаўсюджваецца хутка, пры гэтым сімптомы віруса нагадваюць прастуду. Акцэнт робяць на хатняе лячэнне, шпіталізуюць пацыентаў толькі з цяжкай ці сярэдняй формай. Дарэчы, калі раней у Дзяржынскай ЦРБ у чырвонай зоне было амаль 200 ложкаў - зараз перапрафіляваныя каля 60 месцаў.
Каб пазбегнуць выпадковага інфіцыравання, патокі пацыентаў падзялілі. Планава прымаюць у тэрапеўтычным і хірургічным аддзяленнях, працуюць педыятры, неўролагі. Людзі звяртаюцца для праходжання камісій, актыўна робяць прышчэпкі. Дарэчы, поўны курс вакцынацыі прайшлі ўжо больш за палову жыхароў Дзяржынскага раёна (лічба сярэдняя і па вобласці).
