Матэматычны разлік, уважлівасць і трэніроўка вытрымкі. У Мінскай вобласці актыўна развіваецца гарадошны спорт. У жыццё яго вяртаюць аматары і прафесіяналы. Сярод гульцоў у гарадкі шмат чэмпіёнаў абласнога, рэспубліканскага і міжнароднага ўзроўняў. У эпоху сучасных тэхналогій гульня на свежым паветры прыцягвае да сябе ўсё больш моладзі, якая цікавіцца актыўным адпачынкам. Правілы гульні ведае і наш карэспандэнт Таццяна Бажко.
Каб дакладна трапіць у цэль, біту (не больш за метр у даўжыню, а вагой каля двух кілаграмаў) у руцэ варта трымаць моцна. Мінчанін Дзмітрый Калядзьеў вопытам з навічкамі дзеліцца ахвотна. Больш за 5 гадоў рэгулярна наведвае трэніроўкі пасля змены на Мінскім трактарным заводзе. За гэты час паспеў стаць чэмпіёнам Беларусі па гарадошным спорце сярод аматараў.
У гарадошнай секцыі на базе сталічнай сярэдняй школы № 86 ідзе падрыхтоўка да спаборніцтваў. Для Галіны Жаваранкавай трэніроўкі сталі добрым стартам для больш значных перамог.
Самы новы від гарадкоў - фінскія альбо кюке. Тут свае правілы. Замест звыклай разнастайнасці фігур - скандынаўская статыка.
Новая спортпляцоўка для гульні ў гарадкі хутка з'явіцца недалёка ад станцыі метро "Трактарны завод". Тут змогуць займацца адразу 6 каманд.
Нямала ўвагі надаецца гарадкам і ў рэгіёнах. Профільны стадыён у Маладзечне існуе амаль паўстагоддзя. Штогод тут ладзяцца абласныя, рэспубліканскія і міжнародныя чэмпіянаты. Для гульні ёсць спецыяльнае пакрыццё, навесы. А таксама нават гарадошныя спартыўныя дынастыі.
Таццяна Яршэвіч аднойчы прыйшла на трэніроўку падтрымаць мужа Аляксандра. Зацікавілася. Цяпер сама сярэбраны прызёр сусветнага чэмпіянату. А яшчэ першы майстар спорту па гарадошным спорце Беларусі сярод жанчын.
Побач трэніруецца сям'я Дуйновых. Дзіцячае хобі бацькі спачатку перадалося старэйшай дачцэ Марыі. Цяпер у поўным складзе на трэніроўкі нягледзячы на надвор'е.
Сярод гульнявых лакацый не толькі стадыёны, але і звыклыя двары, і мабільныя пляцоўкі. Аматары гэтага віду спорту ладзяць турзлёты, дзе спаборнічаюць паміж сабой і даюць майстар-класы пачаткоўцам.
