Супрацоўніцтва, якое дае рэальныя лічбы ў эканоміку. Мы рыхтуемся прыняць Форум рэгіёнаў Беларусі і Расіі. Па ліку ён стане 11-м. Гэтым разам гаспадыня пляцоўкі - Віцебская вобласць. Форум упершыню пройдзе адразу ў некалькіх гарадах. Гэта Віцебск, Полацк і Наваполацк. На працягу двух дзён (27 і 28 чэрвеня) нашы краіны прэзентуюць прамысловы, культурны, турыстычны патэнцыял.
Першы Форум рэгіёнаў Беларусі і Расіі прайшоў у 2014 годзе ў Мінску і быў прысвечаны ўзаемадзеянню ў аграпрамысловай сферы. Ідэя пляцоўкі зарэкамендавала сябе як добры прыклад развіцця рэгіянальнага супрацоўніцтва дзвюх краін. І было прынята рашэнне праводзіць форум штогод па чарзе ў кожнай з краін. Яго прымалі Сочы, Мінск і Мінская вобласць, Масква, Магілёў, Санкт-Пецярбург, Гродна, Уфа.
Дарэчы, папярэдні, X форум, які прайшоў у сталіцы Башкартастана, абнавіў свае абсалютныя рэкорды. Было падпісана каля 100 пагадненняў аб супрацоўніцтве, складзена кантрактаў на суму больш за 110 млрд расійскіх рублёў. Планы на бягучы форум - падпісаць 165 пагадненняў і больш за 100 кантрактаў.
На віцебскай зямлі чакаецца звыш 400 удзельнікаў. Сярод іх прадстаўнікі 64 расійскіх рэгіёнаў. Усяго падчас форуму будуць працаваць 9 секцый. Па тэматыках - гэта прамысловасць, аграрны сектар, медыцына, адукацыя, навука і турызм.
Чым яшчэ будзе напоўнена праграма форуму, распавядзе Марына Раманоўская (відэа).