Падарожжа па родным краі ў інтэрактыўным фармаце са святочнай каляднай праграмай прапануе Івянецкі музей традыцыйнай культуры. У экскурсійнай праграме: удзел у народнай гульні "Ката пячы", майстар-клас па стварэнні анёла-абярэга і сустрэча каляднай зоркі. Каларытам зімовага турыстычнага маршруту ўразілася Ларыса Гулякевіч.
"Ката пячы" па-івянецку! Па ўмовах народнай гульні, з цеста выпякаюць духмяную фігуру ката, прывязваюць да столі і пачынаюць гумарыстычны турнір. Пераможцам у такім самабытным спаборніцтве становіцца той, каму ўдасца адкусіць хвост здобнага ката. У жартоўных конкурсах, заданнях і выпрабаваннях госці ўдзельнічаюць з задавальненнем.
Народную гульню традыцыйна праводзяць перад калядамі. Аўтэнтычны абрад трапіў у спіс гісторыка-культурных каштоўнасцяў Беларусі. Лічыцца, што падчас такога свята маладыя людзі нярэдка сустракаюць сваё каханне. На івянецкага "ката" прыехалі не толькі хлопцы ды дзяўчаты, але і замужнія пары.
Калядная вячэра - справа асаблівая. На стале павінна быць 12 посных страў. Абавязкова: куцця, рыба і аладкі з макам. Гэтыя старажытныя традыцыі захаваліся, і зараз у кожнай івянецкай хаце і не толькі.
У святочную праграму "Каляда ідзе!" уваходзяць і батлеечныя спектаклі на рэлігійную і бытавую тэматыку. Драўляны тэатр з лялькамі зрабілі супрацоўнікі музея па ўсіх традыцыйных канонах.
А навагодняя ёлачка ў музеі абавязкова жывая. Асноўныя цацкі - ліхтарыкі і анёлы з паперы. Дарэчы, калядных абярэгаў тут запрашаюць зрабіць сваімі рукамі. Анёл - сімвал любові, дабрыні і чысціні, яшчэ і асабісты ахоўнік.
Падарожжа ў гісторыю роднага краю з інтэрактыўным пагружэннем у самабытныя народныя традыцыі - самы папулярны маршрут для сучасных турыстаў. Таму ў праграме зімовых экскурсій - наведванне беларускіх мястэчак - з атмасферным каларытам, старажытнымі славутасцямі і народнымі абрадамі.