У апошнія сакавіцкія выхадныя ў Мінску канцэрт італьянскага рамантыка Эраса Рамазоці, у Траецкім прадмесці вучаць рабіць лялек, а служыцелі Мельпамены святкуюць Міжнародны дзень тэатра. Падрабязнасці ў нашай рубрыцы «Праменад» з Ларысай Гулякевіч.
Лялькі хэндмэйд! Гэта не проста выстава аўтарскіх работ пад назвай «Тайны чароўнага лесу». Гэта яшчэ і майстар-класы, дзе можна навучыцца рабіць лялечныя вобразы, нават сувеніры-абярэгі.
Музей «Гасцёўня Уладзіслава Галубка», што ў самым рамантычным месцы Траецкага прадмесця на ўзбярэжжы Свіслачы, прапануе выставу «Тайны чароўнага лесу». Міфалагічныя персанажы, якія ахоўваюць лясы, гаі, азёры. Тут і какетлівая Баба-Яга, і жартоўны дамавік.
Больш за 10 гадоў у Мінску працуе школа лялечнага дызайну, дзе можна навучыцца рабіць лялькі, абярэгі, сувеніры. Многія вучні пазней сталі сапраўднымі майстрамі са сваёй творчай індывідуальнасцю. Майстар-класы праводзяцца не толькі для дзяцей, але і для дарослых. Знайдзіце час у выхадныя наведаць лялечную выставу.
Эрас Рамазоці прапануе ў Мінску свой новы альбом «Perfetto». Сапраўднае эрас-шоу адбудзецца заўтра на пляцоўцы "Мінск-Арэны".
Легендарны італьянскі спявак і кампазітар Эрас Рамазоці, песні якога не раз узанчалівалі музычныя чарты ў Італіі, Германіі, Швейцарыі, Аўстрыі, Швецыі і многіх іншых краінах Еўропы і свету.
Эрас Рамазоці са сваім новым альбомам «Perfetto» у Мінску - на самай вялікай канцэртнай пляцоўцы "Мінск-Арэна". Выступленне ў Беларусі - частка яго сусветнага турнэ, у рамках якога запланаваныя 34 канцэрты ў Еўропе, у тым ліку ў Расіі, Грузіі і Азербайджане. «Perfetto» - трынаццаты студыйны альбом больш чым за трыццацігадовую кар'еру Эраса Рамазоці. Першым сінглам рэліза стала кампазіцыя «Alla Fine DelMondo», якая ўжо займае верхнія радкі ва ўсіх магчымых чартах Еўропы.
А Вялікі тэатр Беларусі дае цудоўны балет нашага беларускага кампазітара Яўгена Глебава «Маленькі прынц». Спектакль адбудзецца ў суботу раніцай і ўвечары.
Балет "Маленькі прынц" быў створаны беларускім кампазітарам, народным артыстам СССР і Беларусі Яўгенам Глебавым у 1981 годзе. І ўжо праз год адбылася сусветная прэм'ера ў Хельсінкі. Яшчэ праз год - у 1983-м «Маленькі прынц» быў пастаўлены Генрыхам Маёравым у Вялікім тэатры ў Маскве. Балет ставіўся на розных сусветных сцэнах. І толькі некалькі месяцаў таму - прэм'ера на беларускай сцэне ў Нацыянальным акадэмічным Вялікім тэатра оперы і балета Беларусі. Харэаграфія Аляксандры Ціхаміравай.
Усё самае лепшае і цікавае! Кожны драматычны тэатр падрыхтаваў сюрпрызы да Міжнароднага дня тэатра, які святкуецца прадстаўнікамі Мельпамены 27 сакавіка.
Жартаваць і дэманстраваць майстэрства будуць у Нацыянальным акадэмічным тэатры імя Янкі Купалы. Тут падрыхтавалі імправізаваныя палёты, абяцаюць бойку і жывую музыку ў межах капусніка-канцэрта «Жарт ту ю». А ў Нацыянальным акадэмічным драматычным тэатры імя Горкага ў Дзень тэатра будуць даваць спектакль «Капуста па-руску» і расказваць праўду, якая можа шакіраваць, пра спектаклі, гастролі і рэпетыцыі. ТЮГ дае ў нядзелю прэм'еру - псіхалагічны дэтэктыў паводле Караткевіча «Дзікае паляванне караля Стаха».
Усіх каталікоў віншую з надыходзячым Вялікаднём, нясумных выхадных і да наступнай пятніцы.
