Перасягнуць сябе ва ўсіх сферах жыцця - мэта Года якасці. Ён павінен стаць пачаткам новага этапу развіцця Беларусі. У авангардзе дасягнення гэтай задачы - людзі навукі.
Сёння лепшыя навукоўцы адзначаны высокай увагай: Прэзідэнт уручае ім дыпломы доктара навук і атэстаты прафесара.
Гэта штогадовая традыцыя - на старце года адзначаць поспехі беларускай навукі, падводзіць вынікі, ставіць новыя мэты. Ва ўсім свеце - навука на чале прагрэсу. Праца навукоўцаў фарміруе будучыню. Таму так важна не спыняцца ў навуковым пошуку, развіваць нацыянальную навуковую школу.
Прэзідэнт перакананы: ад дасягненняў навукоўцаў напрамую залежыць не толькі наш дабрабыт і якасць жыцця, але і падмурак дзяржаўнасці.
Вынаходкі нашых навукоўцаў трэба паставіць на службу эканоміцы, патрабуе Прэзідэнт. Нельга дапускаць, каб адкрыцці заставаліся на паперы. Яны павінны прыносіць карысць людзям і краіне.
Прыкладны характар навуковых даследаванняў умацоўвае нашу незалежнасць і нацыянальную бяспеку. У краіне заўсёды падтрымаюць прарыўныя праекты. Але Аляксандр Лукашэнка заклікае засяродзіцца на самых актуальных.
Дыпломы доктара навук з рук Прэзідэнта сёння атрымалі 12 навукоўцаў. І яшчэ 9 - атэстаты прафесара. Распрацоўкі ў медыцыне, гісторыяграфіі, хіміі і фізіцы, эканамічнай палітыцы і лінгвістыцы - гэта толькі некаторыя з адзначаных работ навукоўцаў. Усе яны - наватары ў сваіх сферах.
Прэзідэнт заклікае рухаць навуку наперад, не спыняючыся на гэтым шляху. Без яе немагчыма развіццё. Задача навукоўцаў - падцягваць вытворчасці і эканоміку. А з імі - якасць нашай прадукцыі.
