Спецыялісты Міністэрства аховы здароўя Беларусі б'юць трывогу з-за колькасці траўміраваных падчас зімовых забаў. З пачатку сезона ўжо звыш 200 дзяцей звярнуліся да спецыялістаў з-за траўм, якія атрымалі ў выніку катання на цюбінгах, лядзянках, санках. У РНПЦ неўралогіі і нейрахірургіі знаходзяцца 48 дзяцей, а ў РНПЦ траўматалогіі і артапедыі - 17. Усе з цяжкімі траўмамі. Часам такія забавы могуць прывесці і да гібелі. Падрабязнасці расказала Дар'я Рачко.
Пра тое, што катанне на цюбінгу можа выклікаць сур'ёзныя наступствы, медыкі гавораць не адзін год. У дзіцячае аддзяленне РНПЦ неўралогіі і нейрахірургіі з пачатку зімовага сезона паступілі 48 дзяцей з чэрапна-мазгавымі траўмамі. З іх 20 % шпіталізаваныя.
Стан траўміраванай Насці не вельмі добры: пакуль баліць галава, але ўрачы даюць станоўчы прагноз. 7-гадовае дзіця атрымала чэрапна-мазгавую траўму сярэдняй ступені цяжкасці - так скончыліся катанні дзяўчынкі на цюбінгу. Яна ведала ўсе правілы, не ўбачыла толькі хлопца, які, здавалася, вось-вось адыдзе ў бок.
Падобная гісторыя адбылася ў Лагойску. Сур'ёзную траўму галавы атрымаў 8-гадовы хлопчык. Пры спуску цюбінг выскачыў з-пад дзіцяці, хлопчык упаў на зямлю і пакаціўся ўніз. Ад удару страціў прытомнасць. Брыгада хуткай дапамогі зрэагавала хутка. Зараз хлопчык знаходзіцца пад назіраннем урачоў.
І такіх гісторый з траўмамі з пачатку зімы звыш двухсот. Для катання на цюбінгах, лядзянках, санках мала ведаць правілы. Неабходна сачыць за сваімі дзецьмі, не пакідаць іх без нагляду - гэта самае галоўнае. Ватрушка павінна быць у меру напампаваная і адпавядаць узросту. Спуск павінен знаходзіцца ўдалечыні ад праезнай часткі, дрэў і быць без ям. Катацца трэба толькі седзячы і толькі па адным. У крытычнай сітуацыі лепш заваліцца на бок.
Толькі ў Мінску абсталявана звыш паўсотні горак для катання на цюбінгу. Побач знаходзяцца інфармацыйныя стэнды, на якіх напісаны правілы бяспекі, а таксама ёсць спецыяльныя агароджы. Пры гэтым самі горкі знаходзяцца пад назіраннем камунальных служб. Выбар застаецца за вамі.
