Будучых навукоўцаў, моцных выкладчыкаў ВНУ неабходна шукаць і сярод практыкаў і рацыяналізатараў на вытворчасці. Такое меркаванне сёння выказала спікер верхняй палаты парламента Наталля Качанава на пасяджэнні экспертна-кансультатыўнага савета пры прэзідыуме Савета Рэспублікі ў Гродне. Удзельнікі сустрэчы абмеркавалі пытанні падрыхтоўкі навуковых кадраў для ВНУ краіны, магчымасці прыцягнення ў навуку моладзі і распрацоўку пэўных ільгот і прэферэнцый для маладых навукоўцаў. Як адзначыла Наталля Качанава, развіццё краіны немагчыма без падрыхтоўкі кваліфікаваных кадраў, і неабходна надаць увагу менавіта тым, хто будзе вучыць будучых спецыялістаў. Гэта павінны быць прафесіяналы.
Важнасць прыцягнення ў навуку моладзі адзначыў і намеснік старшыні Пастаяннай камісіі Савета Рэспублікі па адукацыі, навуцы, культуры і сацыяльным развіцці Андрэй Іванец. Неабходна абнаўляць і ўдасканальваць матэрыяльную базу навукі, а самі даследаванні павінны быць арыентаваныя на патрэбнасці эканомікі.
Удзельнікі пасяджэння наведалі навукова-тэхналагічны парк Гродзенскага ўніверсітэта імя Янкі Купалы, пазнаёміліся з узорамі прадукцыі, што выпускаецца, і пагутарылі з яго рэзідэнтамі (у тым ліку і са студэнтаў ВНУ).
У Гродзенскім дзяржаўным універсітэце працуюць 12 навукова-даследчых і вытворчых лабараторый. Навучаюцца каля тысячы замежных студэнтаў больш чым з 20 краін. На 12 факультэтах вучацца больш як 11 тысяч студэнтаў па 65 спецыяльнасцях.
