Прэзідэнт Беларусі Аляксандр Лукашэнка даў згоду на ўнясенне ў Палату прадстаўнікоў праекта закона "Аб спыненні дзеяння Дагавора аб звычайных узброеных сілах у Еўропе". Але гэта не азначае выхад Беларусі з пагаднення. І ва Узброеных сілах пакуль не збіраюцца спыняць працэдуры, звязаныя з яго выкананнем.
Дагавор быў ратыфікаваны Беларуссю і ўступіў у сілу ў 1992 годзе. Сутнасць ДЗУС у тым, што ўстанаўліваюцца пэўныя квоты па колькасці асабістага саставу, узбраенні, ваеннай тэхнікі для кожнай дзяржавы, таксама меры кантролю за выкананнем гэтых лімітаў. Але з 2020 года многія краіны Еўрасаюза не прымаюць інспектараў з Беларусі, тым самым парушаючы ўмовы дагавора. Да таго ж не ўсе дзяржавы Еўропы падпісалі гэту ўмову.
У жніўні 2022 года Чэхія, а ў сакавіку 2024 года Польшча прынялі рашэнне аб невыкананні Дагавора ў дачыненні да Беларусі. Яшчэ ў лістападзе 2023-га Паўночнаатлантычны савет НАТА зрабіў заяву аб намеры краін - членаў Альянсу, якія ўдзельнічаюць у Дагаворы, спыніць яго дзеянне. З ДЗУС таксама выйшла Расія, 8 красавіка гэта зробіць і Турцыя. Спыненне дзеяння Дагавора краінамі - членамі НАТА і іх саюзнікамі фактычна азначае спыненне яго функцыянавання.
