У Беларусі сёлета адчыняць дзверы больш за тры тысячы школ. Амаль усе атрымалі пашпарты гатовасці

Кожны дзень набліжае пачатак новага навучальнага года. У разгары пара перадшкольных клопатаў для дзяцей і іх бацькоў. Асаблівы час для навучальных устаноў. У Беларусі сёлета сваіх вучняў прымуць больш за 3 000 школ. Амаль усе яны ўжо атрымалі пашпарты гатовасці. Адрамантаваныя кабінеты, закуплена новае абсталяванне. З пачаткам верасня ў краіне адкрыюцца шэсць новых дзіцячых садоў і восем школ. За парты сядуць адзін мільён трыццаць тысяч вучняў, у тым ліку першы раз у першы клас адправяцца 115 000 першакласнікаў. Выбраць форму і заплечнік, купіць сшыткі, пенал, альбомы для іх - вельмі важны клопат! Таму ў гэтыя дні па ўсёй краіне праходзяць дабрачынныя акцыі. У іх розныя назвы, але мэта адна - напоўніць заплечнік дзяцей з малазабяспечаных, няпоўных, шматдзетных сем'яў, выхаванцаў інтэрнатаў неабходнымі школьнымі прыладамі. Тэму працягне Вольга Маслоўская.

У нашай краіне больш за 106 000 шматдзетных сем'яў. У большасці з іх выхоўваюцца школьнікі. 
Дня не праходзіць, каб Маша Кандрацьева не зайшла на школьны двор. Не толькі таму, што тут працуе яе мама: Машы карціць сесці за парту. Сёлета яна першакласніца. Ужо вывучыла літары і выбрала школьную сукенку. 

А ў вялікай сям'і Кандрацьевых да навучальнага года рыхтуюцца чатыры сыны: старэйшы Данііл вучыцца ў каледжы, Мікіта і Ілья - школьнікі. Самы маленькі Ягор у садзе, але ўжо з ахвотаю вучыць літары. Як і яго браты, дома будзе з цікавасцю разбіраць новы школьны заплечнік з падарункамі. 

У нашай краіне больш за 106 000 шматдзетных сем'яў. У большасці з іх выхоўваюцца школьнікі. Такім сем'ям падрыхтавацца да навучальнага года дапамагае дзяржава: толькі сёлета матэрыяльныя выплаты склалі амаль восем мільёнаў рублёў. 

Перад пачаткам навучальнага года валанцёраў можна сустрэць у многіх буйных гандлёвых цэнтрах краіны. 

Дапамагаюць сабраць школьны партфель і простыя беларусы. Купляюць прылады для тых, каго на святочную лінейку павядуць не бацькі, а выхавальнікі інтэрната. 

Перад пачаткам навучальнага года валанцёраў можна сустрэць у многіх буйных гандлёвых цэнтрах краіны. Алоўкі, ручкі, альбомы, пеналы - усё, што пакладуць у вялікі школьны кошык неабыякавыя людзі, возьмуць з сабою ў клас дзеці з малазабяспечаных сем'яў. 

Сёння актывістаў БРСМ сустракаюць выхаванцы Полацкага сацыяльна-педагагічнага цэнтра. Зараз тут сем дзяцей. Усе вучні. А бойкая Эмілія ўпершыню надзене школьную форму. Выдатна спявае і танцуе, а астатняму навучаць у школе!

Усяго ў краіне адчыняць дзверы больш за тры тысячы школ. Ужо заўтра ўсе яны будуць гатовыя да новага навучальнага года на 100 працэнтаў. Пашпарты гатовасці засталося атрымаць усяго некалькім такім навучальным установам.

Эксперыментальная і самая сучасная 61-я сталічная школа яго атрымала яшчэ ў ліпені. У гэтым навучальным годзе папяровыя дзённікі тут зменяць на электронныя. Эксперымент стартуе ў старшых класах з другой чвэрці. І гэта не адзіная навінка будучага навучальнага года.

Сёлета ў Дзень ведаў у Беларусі ўпершыню расчыняць дзверы восем школ і шэсць дзіцячых садоў. А будоўля гэтай школы ў густанаселеным раёне Віцебска ўжо атрымала статус моладзевай. Разам з будаўнікамі штодня тут працуюць і члены студэнцкіх атрадаў. Добраўпарадкаванне тэрыторыі, усталёўка трэнажораў на спартыўных пляцоўках - у вялікіх справах лішніх рук не бывае. 

Школа ў Білеве разлічаная на 1200 вучняў. Тут будуць два басейны, гімнастычная і спартыўная залы. Ужо праз год замест пашпарта аб'екта з'явіцца шыльда "Сярэдняя школа № 47 Віцебска".